Monsieur, suivant ce quil vous plust yer me commender

par votre lettre, ie fis a compagner le courier de ce

iourdhuy ; avons seu par le guide que luy avois faict

donné quil est aryvé à Montelymar en surtté. Ie nusse

manqué ce iourdhuy faire le reste qui est contenu

en vostre escript, neust esté que ceulx de ceste ville

ont esté avertys que les ennemis ont quelque inteligence

en ce lyeu, lequel il[s] doibvent surprandre par certain

trous qui leur seront faicts sous la muraille à la

faveur doqunes quaves ou maysons ioegnant à icelle

et enquores que ce soibt chose difiscile à croyre, si

nay ie esté negligent de faire visitter tout ce qui

touche les dictes murailles où il ne cest trouvé

nulle aparance de ce que dessus. Toutefois, monsieur,

ie nay voulu faillir vous en avertyr, ensamble

vous souvenir du peu de nombre de soldas quil

y a en ceste place pour estre de la garde, dequoy

elle est car quant aulx sitadins pour estre gens

non reglés sous la milysie il y a bien peu dassurance ;

et touchant la compagnye du capitène Menon, en

estant distraist ceulx qui sont à La Vache, elle

est fort affoyblye, qui me faict vous supplier

si lavés agreable, vouloyr ordonner daultre

soldas en leur lyeu et qui ceulx viennent trouver

leur enseigne. Ie ne faudray vous faire savoyr

tout ce que

[barré : ap]

cognoystrés estre digne de vous

mander : ce pandant, ie vous bayse très humblement

les mains et requeray Dyeu vous donner,

monsieur, très longue et heureuse vie. D’Estoylle,

ce XVe mars 1574

Votre humble et obeissant

serviteur

L. de Rochefort

Consultation